မြသိန်းတန်စေတီတော်

ကောဇာသက္ကရာဇ် ၁၉၀၊ အေဒီ ၈၂၈ တွင် လွမ်းစေတီအမှတ်တရများအဖြစ် ရွှေဖရုံမယ်မိဖုရားကြီးမှတည်ထားကိုးကွယ်ခဲ့ပါသည်။ မြန်မာသက္ကရာဇ် ၁၃၂၆ ခုနှစ်တွင် အလှူဒါယကာမဒေါ်ပန်းခုံမှ မြသိန်းတန်စေတီတော်ကြီးကိုအုတ်မြစ်ချ၍ ဉာဏ်တော် (၄၅) တောင် (၆၇ပေ၆ လက်မ) အမြင့်ရှိသောစေတီတော်ကိုတည်ထားခဲ့ပါသည်။ ခရစ်နှစ် ၂၀၀၇ခုနှစ်တွင် မြိုင်ကြီးငူဆရာတော်ဦးသုဇနမှ ထီးတော်တင်လှူခဲ့ပါသည်။ ယခုအခါမြသိန်းတန် ကျောင်းတိုက်ဆရာတော် ဦးဇာဂရိယမှ ဘုရားကြီးစည်ပင်တိုးတက်ရေးအား ဦးစီးဆောင်ရွက်လျက် ရှိနေပြီး လျှပ်စစ်မီးအလှူရှင်ရရှိရေးမှာအလိုအပ်ဆုံးဖြစ်ကြောင်း မိန့်ကြားခဲ့ပါသည်။ ရှေးဟောင်း သမိုင်းဝင်ဘုရားစေတီဖြစ်သည့်အတွက် အနယ်နယ်အရပ်ရပ်မှ ဘုရားဖူးပြည်သူများဖြင့် စေတီတော်တိုး တက်စည်ကားရေးကို ဒေသခံများကလိုလားလျက်ရှိသည်။ ဂေါပကအဖွဲ့ကထိန်းသိမ်းစောင့်ရှောက် ထားပြီး မြသိန်းတန်စေတီဘုရားပွဲ ကို နှစ်စဉ်တပို့တွဲလပြည့်နေ့မှ စတင်၍ငါးရက်ကြာ ကျင်းပလေ့ ရှိကြောင်း သိရသည်။

(ရှေးဟောင်းသုတေသနနှင့်အမျိုးသားပြတိုက်ဦးစီးဌာန၊ ပဲခူးဌာနခွဲ၊ Knowledge Corrider, wikipedia)